सहकारिता मंत्री केदार कश्यप ह गांव बदनारा (नवागढ़) म जिला सहकारी केन्द्रीय बैंक मर्यादित, दुर्ग के चार नवा शाखा- बदनारा, कन्हेरा, सत्धा अउ गोडगिरी के लोकार्पण करिन। ए मउका म खाद्य मंत्री दयाल दास बघेल, विधायक बेमेतरा दीपेश साहू, विधायक साजा ईश्वर साहू, अध्यक्ष जिला पंचायत सुनीता हीरालाल साहू अउ ओमप्रकाश जोशी सहित ग्रामीणजन के स्थानीय प्रतिनिधि उपस्थित रिहिस।
मुख्य अतिथि के आसन ले बोलत सहकारिता मंत्री केदार कश्यप ह किहीन कि ए बैंक ह ग्रामीण क्षेत्र म वित्तीय सुविधा देवाय अउ सहकारिता मन ल सशक्त बनाय म मददगार होही। किसान, मजदूर अउ छोटे उद्यमी मन ल साख, बचत अउ दूसर बैंकिंग सेवा मिलही, जेखर ले ए क्षेत्र म आर्थिक विकास ल बढ़ावा मिलही। ये पहल सहकारी समिति के सिद्धांत ल मजबूत करे के संग ग्रामीण उत्थान म महत्वपूर्ण भूमिका निभाही। ए मउका म मंत्री ह किसान मन ल गमछा अउ बैंक के एटीएम घलो बांटीन।
सहकारिता मंत्री केदार कश्यप ह किहीन कि हमर सरकार किसान मनके जम्मों समस्या ल दूरिहा करे बर प्रतिबद्ध हे। किसान मनके हित ल सर्वोपरि रखत बेमेतरा जिला म चार नवा सहकारी बैंक शाखा सुरू करे गे हावयं। ए साखा मन ल खोले ले किसान मन ल आर्थिक सहायता मिले म आसानी होही, जेखर ले ओमन ल साख, बीज, उर्वरक अउ आने कृषि जरूरत ल पूरा करे म मदद मिलही। ए कदम किसान मनके आर्थिक स्थिति म सुधार अउ ओमन ल आत्मनिर्भर बनाय के दिसा म एक ठिन महत्वपूर्ण परयास हे।
सहकारिता मंत्री केदार कश्यप ह यहू बतईन कि धान खरीदी के माध्यम ले किसान महोत्सव सुरू होय हे। ये हमर खातिर एक महत्वपूर्ण मउका हावय, काबर के ये समय किसान मन के मेहनत के सम्मान करे अउ उंकर धान के उचित कीमत सुनिश्चित करे के हावय। ओमन स्पस्ट करीन कि कोनों भी किसान के धान वापिस नइ जाय, अउ सरकार ह ए तय करही कि हरेक किसान के धान खरीदे जाय। ए कदम किसान मन ल उंखर उपज के सही कीमत देवाय अउ उंखर आर्थिक स्थिरता ल मजबूत करे के दिसा म हे।सहकारिता मंत्री केदार कश्यप ह अपन संबोधन म किहीन कि किसान खाद्य प्रदाता हरय, अउ उंखर सम्मान करना हमर कर्तव्य हरय। ओमन कीहिन कि हम सबो किसान मनके सपूत हन अउ किसान मनके समस्या ल बहुत बढ़िया ढंग ले समझत हन। धान खरीदी केन्द्र मन म किसान मन ल जम्मों जरूरी सुविधा दे जाही, जेखर ले ओमन ल कोनों किसम के परेसानी झन होवय। सरकार ये सुनिश्चित करत हावय के किसान मन ल धान बेचे म कोनो प्रकार के असुविधा झन होवय, अउ उंकर फसल के उचित कीमत समय म मिलय।
कार्यक्रम ल संबोधित करत खाद्य मंत्री दयाल दास बघेल ह किहिन के आज के दिन बदनारा के लोगन के खातिर बहुत खुशहाल दिन हावय। किसान मनके हित ल धियान म राखत राज्य सरकार ह बेमेतरा जिला म चार ठिन नवा सहकारी बैंक सुरू करे हे। एखर ले किसान मन ल अपन पइसा बर दूसर बैंक म भटके के जरूरत नइ पड़ही। अब ओमन ल स्थानीय स्तर म सहकारी बैंक ले आसानी ले ऋण अउ दूसर वित्तीय सेवा मिल सकही, जेखर ले उंखर कृषि जरूरत ल बेरा म पूरा करे जा सकही। सहकारी बैंक खोले ले किसान मन ल तुरते रासि मिल सकही। अब ओमन ल अपन वित्तीय जरूरत बर लंबा प्रक्रिया या दूसर बैंक ले नइ गुजरना पड़ही। ए बैंक के माध्यम ले किसान मन ल जल्दी कर्जा अउ आर्थिक सहायता मिल सकही, जेखर ले ओमन अपन कृषि काम समय म पूरा कर सकही। एखर ले उंखर उत्पादकता बाढ़ही अउ आर्थिक स्थिति घलो मजबूत होही। किसान मन ले करे गे वादा ल हमन पूरा करीन। महतारी वंदना योजना ले सबो महिला मन ल आर्थिक मजबूती मिलिस। हम सबो जिला के विकास के खातिर प्रतिबद्ध हावयं।
आप मन पढ़तहव छत्तीसगढी न्यूज़ पोर्टल 36गढ़ी.com
