अमेरिका के राजदूत एरिक गारसेट्टी ह मुख्यमंत्री विष्णुदेव साय ले भेंट करीन

भारत म अमेरिका के राजदूत छत्तीसगढ़ के विकास के खातिर मुख्यमंत्री साय के विजन ले परिचित होइस

रक्षा, लॉजिस्टिक्स, आईटी अउ सेमीकंडक्टर जइसे क्षेत्र म निवेश म महत्वपूर्ण चर्चा

छत्तीसगढ़ बिजली उत्पादन म सरप्लस राज्य हावय, निवेश के अपार संभावना हावय : राजदूत एरिक गारसेट्टी

मुख्यमंत्री ह छत्तीसगढ़ हर्बल के स्थानीय उत्पाद ल प्रस्तुत करिन।

मुख्यमंत्री के संग चाय के मजा लेके बाद गरसेट्टी ह किहिन के मोला चाय बहुत पसंद हावय।

छत्तीसगढ़ आना मोर सपना रिहिस, छत्तीसगढ़ के स्वरूप अउ उंकर पर्यटन स्थल, संस्कृति के बारे म बहुत पढ़े-सुने रिहिस। आज इहां आना बहुत अच्छा हावय। ए बात भारत म अमेरिका के राजदूत एरिक गार्सेट्टी ह सीएम हाउस म मुख्यमंत्री विष्णुदेव साय ले सौहार्दपूर्ण भेंट के दउरान किहीन। ओमन कीहिन कि छत्तीसगढ़ सांतिपूर्ण अउ सुंदर राज्य हे। ए सुंदर राज्य के विकास यात्रा म अमेरिका तको भागीदार होही।

मुख्यमंत्री विष्णुदेव साय ले भेंट के दउरान राजदूत गरसेट्टी ह राज्य म निवेस, सांस्कृतिक पहलू अउ आर्थिक अवसर ल बढ़ावा देके संबंध म गहन चर्चा करीन।  मुख्यमंत्री ह ओला छत्तीसगढ़ म करे जात विकास बुता अउ नवा औद्योगिक नीति ले निवेशक मन के खातिर बनाये गे अनुकूल वातावरण के बारे म विस्तार ले जानकारी दीस। ओमन किहीन कि हमर राज्य वैश्विक निवेसक मन बर खुला हे अउ हर क्षेत्र म बड़का विकास होवत हे। अमेरिका जइसे सहयोगी मनके सहयोग हमर खातिर गर्व के बात हावय।

चरचा के दउरान राजदूत गरसेट्टी ह किहीन कि बिजली उत्पादन के क्षेत्र म छत्तीसगढ़ सरप्लस राज्य हे। ऊर्जा, रक्षा, लॉजिस्टिक्स, आईटी अउ सेमीकंडक्टर जइसे क्षेत्र म निवेश के अपार संभावना हावय। राजदूत ह बतईन कि छत्तीसगढ़ म अमेरिका के आने-आने कपनी डहार ले निवेस ल बढ़ावा दे बर मिलके काम करे जाही। छत्तीसगढ़ वैश्विक निवेशक मन बर एक ठिन महत्वपूर्ण गंतव्य बन सकत हे। मुख्यमंत्री ह गरसेट्टी ले किहीन कि छत्तीसगढ़ म जम्मों निवेसक मनके स्वागत हे अउ ओमन ल जम्मों जरूरी सुविधा देवाय बर सरकार ह काम करही।

राजदूत गरसेट्टी ह बतईन कि ओमन अपन परिवार के संग बस्तर आही।

गोठबात के दउरान मुख्यमंत्री ह अमेरिका के राजदूत एरिक गारसेट्टी ले किहीन कि हमर छत्तीसगढ़ ह सुघ्घर राज्य हे। प्रकृति के गोद म बसे सुरम्य पर्यटन जगह हावयं। छत्तीसगढ़ आए हावयं त बस्तर जरूर घुमे हावयं। मुख्यमंत्री के अनुरोध म गरसेट्टी ह किहिन के मैं पूरा परिवार के संग बस्तर घुमे जरूर आबो।

ए दउरान मुख्यमंत्री साय अउ राजदूत गरसेट्टी ह कतकोन मुद्दा उपर गोठबात करीन। राजदूत ह मुख्यमंत्री ले कई ठिन रोचक सवाल घलो पूछीन। मुख्यमंत्री  साय ह घलो अपन सार्वजनिक अउ व्यक्तिगत जीवन ले जुड़े बिसय उपर बड़ सहजता ले गोठबात करीन। दूनों झन ह सदन के सदस्य मनके हालचाल जानके उंखर बारे म जानकारी लीन। दूनों झन ये बात ल बहुत मिलनसार तरीका ले साझा करत रिहिस, जेकर ले अइसे नइ लगत रिहिस के वो पहिली बार मिलत हाबे। मुख्यमंत्री ह भांगड़ा नृत्य अउ हिन्दी सिनेमा के गीत के प्रति जुनून के खातिर राजदूत गरसेट्टी के तारीफ करिन। गरसेट्टी ह मुख्यमंत्री ले किहिन के अवइया देवारी म हम एक संग मनाबोन अउ नृत्य करबो।