चिंतन शिविर छत्तीसगढ़ सरकार के कामकाज ल अउ जादा प्रभावी अउ जनहितैषी बनाय के उद्देश्य ले भारतीय प्रबंधन संस्थान-आईआईएम रईपुर म चिंतन शिविर दू दशमलव शून्य के आयोजन करे गीस। ए शिविर म केन्द्र अउ राज्य सरकार के योजना मन ल लोगन तक पहुंचाय बर नवाचार अउ सुसासन के आधुनिक तकनीक उपर गहन गोठबात करे गीस। मुख्यमंत्री विष्णुदेव साय अउ उंखर मंत्रिमंडल के सहयोगी मन ह सुसासन के आने-आने पहलू उपर बिसय बिसेसज्ञ मन संग अपन विचार साझा करीन। चिंतन शिविर के समापन दिन प्रधानमंत्री के आर्थिक सलाहकार परिषद के सदस्य संजीव सान्याल ह “सुशासन के कला” बिसय उपर व्याख्यान दीन अउ प्रशासनिक प्रक्रिया के सरलीकरण, राज्य के क्षमता बढ़ाय, अनावश्यक नियम ल हटाय अउ सरकारी एजेंसी के पुनर्गठन जइसन महत्वपूर्ण बिसय उपर प्रकास डालीन। ओमन बतईन कि सरकार मन अपन नीति बनाय अउ क्रियान्वयन के गुणवत्ता ल कइसे अउ जादा प्रभावी बना सकत हे।
डिजिटल स्वास्थ्य तकनीक अउ सुसासन के संबंध म डॉक्टर राजेन्द्र प्रसाद गुप्ता ह किहीन कि डिजिटल स्वास्थ्य प्रौद्योगिकी दूर-दराज अउ पिछड़ा क्षेत्र म घलो गुणवत्तापूर्ण सेवा देवाय म सक्षम हे। ओमन ई-हेल्थ रिकॉर्ड, टेलीमेडिसिन, मोबाइल हेल्थ ऐप अउ आर्टिफिशियल इंटेलिजेंस जइसन तकनीक के माध्यम ले स्वास्थ्य सेवा के पारदर्शिता अउ जवाबदेही बढ़ाय के उपाय सुझाईन। ओमन कीहिन कि डिजिटल स्वास्थ्य प्रौद्योगिकी न सिरिफ स्वास्थ्य सेवा ल सशक्त बनाथे बल्कि सासन म आम जनता के विशवास घलो बढ़ाथे। राजनीतिक विश्लेषक अउ लेखक उदय महूरकर ह भारतीय लोकतंत्र के ऐतिहासिक परिप्रेक्ष्य, राजनीतिक आचरण के गुणवत्ता, प्रशासनिक जवाबदेही अउ नीति मनके जनहितैषी क्रियान्वयन बिसय उपर “सुशासन ले चुनाव” बिसय उपर बिस्तार ले गोठबात करीन। ओमन किहीन कि सुघ्घर अउ पारदर्शी सासन के बेवस्था ले लोकतंत्र म लोगन के विशवास बाढ़थे अउ चुनावी प्रक्रिया ल घलो परभावित करथे।
