मुख्यमंत्री ह किहीन कि सफलता निष्ठा, ईमानदारी, अउ समर्पण ले मिलथे

मुख्यमंत्री विष्णुदेव साय ह साइंस कॉलेज म स्थित दीनदयाल ऑडिटोरियम म युवा महोत्सव के शुभारंभ मउका म युवा मन ल संबोधित करत किहिन के आप सबो देश अउ प्रदेश के भविष्य हावयं। कइसे देश अउ राज्य के सेवा करना चाहत हावयं येकर सपना के संग ओला हासिल करे के खातिर पूरा समर्पण, ईमानदारी, अउ प्रतिबद्धता के संग अध्ययन करें। छत्तीसगढ़ म तकनीकी, चिकित्सा, कानून, अउ प्रबंधन ले जुड़े उच्च स्तरीय शैक्षणिक संस्थान हावयं। प्रतियोगी परीक्षा के तैयारी बर रईपुर के नालंदा परिसर युवा मन बर चौबीस घंटा खुले हे। संगेसंग नालंदा परिसर के तर्ज म प्रदेस के आने जिला मन म हाईटेक लाइब्रेरी के स्थापना घलो करे जात हे, जिहां ऑनलाइन-ऑफलाइन प्रतियोगी परीक्षा के तैयारी बर सामग्री उपलब्ध रइही।

मुख्यमंत्री ह बस्तर क्षेत्र के युवा मन ल देस अउ प्रदेस के मुख्यधारा के विकास ले जोड़े बर राखे गे बस्तर ओलंपिक के सफलता के जिकर करत किहीन कि प्रधानमंत्री नरेन्द्र मोदी ह ए आयोजन के प्रसंसा करे हे। ओमन स्वामी विवेकानंद के जयंती के मउका म युवा मन ल बधाई देवत बछर अट्ठारह सौ तिरानवे म अमेरिका के शिकागो म राखे गे विशव धर्म संसद के जिकर करीन।

मुख्यमंत्री ह युवा मन ले अपन संवाद के शुरूआत म अंबिकापुर के अपूर्वा दीक्षित के एक सवाल के जवाब म किहिन के जीवन म कई बार अइसे परिस्थिति आथे जेन मन ल परेशान करथे, फेर हमन ल अपन लक्ष्य के प्राप्ति म अडिग रहना चाही। ओमन स्वामी विवेकानंद के जीवन ले जुड़े लघुकथा सुनावत बतईन कि स्वामी विवेकानंद वाराणसी म एक साधु के संग चलत रिहीन, तभे बड़ संख्या म बंदर मन ह ओला घेर लीन। ओ स्थिति म स्वामी जी न तो डरे अउ न ही अपन ठऊर ले हटगे। जेखर ले जम्मों बंदर भाग गे। ओमन युवा मन ले आग्रह करीन कि हमन ल घलो अपन लक्ष्य ल हासिल करे म डटे रहना चाही। दृढ़ संकल्प ले सबो समस्या के निराकरण करे जा सकत हावय।

रायगढ़ के ओ.पी. जिंदल विश्वविद्यालय के छात्र श्रुति के सवाल के जवाब म मुख्यमंत्री श्री साय ह किहीन कि सफलता क्षेत्र चुने अउ पूरा दृढ़ संकल्प अउ समर्पण के संग काम करे ले मिलथे। बस्तर म सांति अउ विकास के संबंध म राजकुमार कुरेती के सवाल के जवाब देवत मुख्यमंत्री ह बतईन कि बस्तर के नक्सल परभावित पांच ठिन जिला म सुरक्षा अउ विकास ल लेके सरकार ह पूरा प्रतिबद्धता के संग काम करत हे। ये जिला म 39 सुरक्षा शिविर के स्थापना अउ नियाद नेला नार योजना के माध्यम ले लोगन तक सरकारी योजना अउ कार्यक्रम के लाभ सुनिश्चित करे के बुता करे जात हावय। ओमन बताइन कि राज्य म डबल इंजन के सरकार हे। प्रधानमंत्री श्री नरेंद्र मोदी अउ केंद्रीय गृह मंत्री अमित शाह 31 मार्च 2026 तक देश ले नक्सलवाद ल खतम करे के खातिर प्रतिबद्ध हावयं। नक्सलवाद के पूरा उन्मूलन के खातिर हमर सरकार जेन प्रतिबद्धता अउ रणनीति के संग काम करत हावय, ओकर ले हमन मानत हावयं के हम निर्धारित समय सीमा ले पहिली ही ए लक्ष्य ल पा लेबो। मुख्यमंत्री ह किहीन कि बस्तर म सांति अउ विकास के स्थापना बर उहां के लोगन मन घलो सक्रिय रूप ले भाग लेवत हे।