36 गढ़ीFEATUREDLatestदेश विदेसमनोरंजनराजनीतिविविध

छत्तीसगढ़ म औद्योगिक अउ सामाजिक विकास म एक नवा गति

अडानी समूह के अध्यक्ष डहर ले मुख्यमंत्री विष्णुदेव साय ले होइस बइठक

शिक्षा, स्वास्थ्य, कौशल विकास, अउ पर्यटन के संगेसंग आने आने काम ल बढ़ावा दे बर अवझ्या चार बछर म दस हजार करोड़ रूपिया के खरचा करे जाही

अडानी समूह ऊर्जा अउ सीमेंट क्षेत्र म विस्तार परियोजना म 65 हजार करोड़ के निवेश करही

आज अडानी समूह के अध्यक्ष गौतम अडानी ह मुख्यमंत्री विष्णुदेव साय ले उंखर निवास म सौजन्य भेंट करीन। चरचा के दउरान अडानी ह उल्लेख करीन कि छत्तीसगढ़ सरकार के दूरदर्शी अउ पारदर्शी नीति ले उद्योगपति मनके विशवास जीते हे, जेखर असर ले अडानी समूह के रईपुर, कोरबा, अउ रायगढ़ म बिजली संयंत्र के विस्तार म साठ हजार करोड़ रूपिया के निवेश करे के योजना बने हे। ए परियोजना ले छत्तीसगढ़ के बिजली उत्पादन क्षमता म अतिरिक्त छह हजार एक सौ बीस मेगावाट के बढ़ोतरी होही। ऊर्जा क्षेत्र म ए बड़े विस्तार ले न सिरिफ राज्य आत्मनिर्भर होही बल्कि दूसर राज्य मन ल ऊर्जा के आपूर्ति म घलो मदद मिलही।

चरचा के दउरान ओमन सीमेंट उद्योग म निवेस ल बढ़ावा देके बात घलो किहीन। सीमेंट संयंत्र-निवेश अडानी समूह ह राज्य म सीमेंट संयंत्र के विस्तार बर पांच हजार करोड़ रूपिया के निवेश करे बर सहमत होगे हे। एखर ले छत्तीसगढ़ म सीमेंट उद्योग मजबूत होही अउ रोजगार के नवा मउका पैदा होही।

नवा योजना म चर्चा होइस गोठबात

मुख्यमंत्री अउ अडानी के बीच होय बइठका के दउरान छत्तीसगढ़ म रक्षा उपकरण निर्माण, डाटा सेंटर, अउ वैश्विक क्षमता केन्द्र स्थापित करे के संभावना उपर गोठबात करे गीस। सरकार के ए पहल प्रदेस ल उभरत उद्योग मनके प्रमुख केन्द्र बनाना हे। वर्तमान जरूरत ल देखत अभिनव गतिविधी ल बढ़ावा दे के संबंध म विचार तको साझा करे गिस।

छत्तीसगढ़ के विकास बर अडानी समूह डहर ले 10 हजार करोड़ रूपिया खर्च करे जाही।

अडानी ह बतईन कि मुख्यमंत्री भूपेश बघेल के सुझाव के आधार म अडानी समूह ह सीएसआर अउ आने स्त्रोत के माध्यम ले शिक्षा, स्वास्थ्य, कौशल विकास, अउ पर्यटन ल बढ़ावा दे बर अवझ्या चार बछर म प्रदेस म करीबन दस हजार करोड़ रूपिया खरच करही। ये पहल राज्य के सामाजिक अउ आर्थिक विकास ल नवा उंचाई म पहुंचाही।

तकनीकी शिक्षा म बिसेस जोर दे जाही

अडानी समूह युवा मन म रोजगार आधारित कौशल विकास के दिसा म काम करही। येकर ले तकनीकी रूप ले कुशल मानव संसाधन के पर्याप्त उपलब्धता सुनिश्चित होही। औद्योगिक प्रशिक्षण संस्थान म पाठ्यक्रम स्थानीय युवा मन के खातिर पर्याप्त मउका उपलब्ध कराये के खातिर भविष्य के जरूरत के मुताबिक तइयार करे जाही। एखर संगेसंग अडानी समूह ह छत्तीसगढ़ म सिक्षा अउ कौशल विकास ल नवा दिसा दे बर नवा रईपुर म स्किलिंग एक्सीलेंस स्कूल अउ प्रीमियम स्कूल के स्थापना करही। ये पहल राज्य के युवा अउ लइका ल गुणवत्तापूर्ण शिक्षा अउ अत्याधुनिक कौशल उपलब्ध कराये, ओला आत्मनिर्भर बनाये के खातिर एक महत्वपूर्ण प्रयास होही।

स्वास्थ्य सुविधा ल बढ़ावा दे उपर काम केन्द्रित होही

एखर संगेसंग अडानी समूह ह छत्तीसगढ़ के नागरिक मन ल उच्च गुणवत्ता वाले स्वास्थ्य सेवा देवाय बर स्वास्थ्य सुविधा के विस्तार करे उपर घलो काम करही। एम्स रईपुर अउ मेकाहारा अस्पताल के तीर मरीज मनके रिश्तेदार मन बर एक हजार बिस्तर के छात्रावास के सुविधा घलो सुरू करे जाही।

पर्यटन अउ ग्रामीण विकास परियोजना ल गति मिलही

अडानी समूह ह छत्तीसगढ़ म ऐतिहासिक अउ सांस्कृतिक स्थल मन ल पर्यटक मन बर आकर्षक बनाय बर नवा परियोजना म काम करही। एखर ले छत्तीसगढ़ के प्राकृतिक सुंदरता अउ सांस्कृतिक धरोहर बर वैश्विक पहिचान हासिल करे म मदद मिलही। अइसने, ग्रामीण विकास के तहत सुविधा के विस्तार बर घलो परयास करे जाही।