नवा बछर के पहिली दिन सचिव अउ विभागाध्यक्ष मनके बइठका म मुख्यमंत्री ह सरकारी काम ल कड़ा करे के मंत्र दीन
आम लोगन के समस्या के निराकरण के खातिर तुरते काम करे : मुख्यमंत्री विष्णुदेव साय
मुख्यमंत्री ह नवा बछर के पहिली दिन सचिव अउ विभागाध्यक्ष मनके बइठका लीन।
मुख्यमंत्री विष्णुदेव साय ह आज मंत्रालय म सबो विभाग के सचिव अउ विभागाध्यक्ष मनके बइठका लेके सरकारी काम म पारदर्सिता अउ कसावट लाय के संगेसंग आम जनता ले जुड़े मामला ल तुरते अउ प्रभावी ढंग ले सुलझाय के निरदेस दीन।
मुख्यमंत्री साय ह बइठका म स्पष्ट रूप ले किहीन कि प्रसासनिक काम म कोनों किसम के ढिलाई बर्दास्त नइ करे जाही। ओमन कीहिन कि वरिष्ठ प्रशासनिक अधिकारी ले लेके निचला स्तर तक के अधिकारी-करमचारी मन समय म कार्यालय आवय अउ पूरा तत्परता के संग अपन दायित्व के निर्वहन करय।
मुख्यमंत्री ह बइठका म किहीन कि बछर दू हजार चौबीस म हमन प्रधानमंत्री नरेन्द्र मोदी के बड़का गारंटी ल पूरा करे हे। साल 2025 छत्तीसगढ़ के रजत जयंती साल हावय। रजत जयंती साल के छत्तीसगढ़ के खातिर विशेष महत्ता हावय, अइसन म बड़ उत्साह अउ भक्ति के संग अपन दायित्व के निर्वहन करें। मुख्यमंत्री ह अधिकारी मन ल बिसेस अभियान चलाके लंबित फाईल के तुरते निपटारा करे के निर्देश दीन। ओमन मंत्रालय सहित सबो कार्यालय म ई-ऑफिस बेवस्था ल सुचारू रूप ले लागू करे के निर्देश दिस।
मुख्यमंत्री साय ह किहीन कि ओमन खुदे जम्मों विभाग मनके काम के समीक्षा करही। ओमन सबो विभागीय सचिव मन ल अपन विभाग के नियमित समीक्षा कराये के निर्देश देत किहिन के हर महीना वर्चुअल समीक्षा के संग हर 3 महीना म भौतिक समीक्षा करे जाए। एखरे संग बड़का योजना मनके क्रियान्वयन म आवत परेसानी के समयबद्ध तरीका ले निराकरण करके मुख्य सचिव अउ प्रमुख सचिव ल सूचना देके परयास करे जाय। मुख्यमंत्री ह किहीन कि आम मनखे मनके समस्या के समय म निराकरण करना जरूरी हे।
मुख्यमंत्री ह किहीन कि हमर धियान ईज ऑफ लिविंग अउ ईज ऑफ डूइंग बिजनेस उपर होना चाही। छत्तीसगढ़ म अभी निवेश के माहौल बहुत अच्छा हावय। छत्तीसगढ़ के औद्योगिक नीति 2024-2030 के पूरा देश म सराहना होवत हाबे। नवा औद्योगिक नीति के फायदा ले बर निवेशक मन ल बिसेस धियान रखना चाही।
मुख्यमंत्री ह किहीन कि प्रदेस म कानून बेवस्था ल मजबूत करे जाय। ओमन किहीन कि पाछु एक बछर म हमन नक्सल मोर्चा म बड़का सफलता हासिल करे हे। हमन नक्सल प्रभावित क्षेत्र म शांति स्थापित करे म सफलता हासिल करे हावन। सरकार के योजना मन ल नक्सल प्रभावित क्षेत्र तक पहुंचाये के जरूरत हावय। ये बहुत जरूरी हावय के क्षेत्र के लोगन ल नियाद नेला नार योजना के लाभ मिलय। उहें, नक्सली क्षेत्र म घलो कई ठिन सुरक्षा सिविर खोले गेहे। धियान रखें के ये क्षेत्र म नियाद नेला नार योजना के तहत आने वाला संबंधित विभाग के बुता तेजी ले पूरा होवत हावयं। सरकार के ए योजना के लाभ छत्तीसगढ़ के सुदूर आदिवासी बहुल क्षेत्र तक पहुंचाये के ये सेवा काम हावय।
मुख्यमंत्री ह किहिन के जिला के प्रभारी सचिव हर 2 महीना म जिला के दौरा करें। ए बखत ओमन जिला के अंदरूनी क्षेत्र म जाके खेत के बारे म जानकारी लें, तभे जमीनी स्तर म योजना मन के क्रियान्वयन के वास्तविक स्थिति के जानकारी मिल सकही। ओमन प्रभारी सचिव मन ले किहीन कि ओमन जिला प्रवास के दउरान मुख्य सचिव अउ प्रमुख सचिव ल उहां के स्थिति के जानकारी देवय।
मुख्यमंत्री ह जिला मन म प्रसासनिक कसावट के बिसेस धियान राखे के घलो निरदेस दीन। मुख्यमंत्री ह किहीन कि यातायात बेवस्था म घलो अब्बड़ धियान देके जरूरत हे। आजकल अब्बड़ अकन सड़क दुर्घटना होवत हे। अभियान चलाके सड़क दुर्घटना ल रोके के मजबूत बेवस्था करे जाय, जेखर ले एला कम करे जा सकय। छत्तीसगढ़ म आन राज्य ले नशीला सामग्री के तस्करी ल कड़ाई ले रोके के जरूरत हावय। मुख्यमंत्री श्री साय ह किहिन के पाछु एक साल म नशा के अवैध कारोबार ल रोके के खातिर अच्छा प्रयास करे गे हावयं, येमा तेजी लाने के जरूरत हावय।
बइठक म मुख्य सचिव अमिताभ जैन, अपर मुख्य सचिव, पुलिस महानिदेशक अशोक जुनेजा, प्रधान मुख्य वन संरक्षक अउ वन बल के प्रमुख वी. श्रीनिवास राव, प्रमुख सचिव, सचिव अउ विभागाध्यक्ष सहित आन अधिकारी उपस्थित रिहिस।