छत्तीसगढ़ बस यात्री मन ल घर बइठे मिलही बस टाइम टेबल अउ बस मार्ग के जानकारी

मुख्यमंत्री विष्णुदेव साय ह ‘बस संगवारी ऐप’ के शुभारंभ करिन

ए ऐप के उपयोग बस यात्री बिसेस रूप ले दूर-दराज के इलाका म यात्री मन बर बहुते सुविधाजनक होही

ए ऐप म पांच हजार ले जादा बस उपलब्ध होही

बस यात्रा छत्तीसगढ़ म बस यात्री मन अब घर बइठे बस शेड्यूल अउ बस मार्ग के जानकारी ले सकही

बस संगवारी ऐप मुख्यमंत्री विष्णुदेव साय ह आज छत्तीसगढ़ राज्य सड़क सुरक्षा परिषद के बइठका म सुसासन के अवधारणा ल लागू करके यात्री मनके यात्रा ल सुघ्घर अउ सरल बनाय बर ‘बस संगवारी ऐप’ के सुरूवात करीन। मुख्यमंत्री श्री साय ह छत्तीसगढ़ परिवहन विभाग के ए पहल के सराहना करत किहिन के बस संगवारी ऐप बस यात्री, विशेष रूप ले दूरस्थ क्षेत्र के यात्री मन के खातिर बहुत सुविधाजनक होही। अवइया बेरा म अंतर्राज्यीय बस के परिवहन अउ बस मनके रियल टाइम ट्रेकिंग के सुविधा घलो ए ऐप के माध्यम ले मिलही। अभी यात्री मन ल बस के बेरा जाने बर बस स्टैंड या बस स्टॉप जाना पड़त हे। लोगन मनके ए समस्या के समाधान ए ऐप के माध्यम ले निकाले जाही

परिवहन विभाग के सचिव एस. प्रकाश ह मुख्यमंत्री साय ल बस संगवारी ऐप के संचालन के बारे म बिस्तार ले जानकारी दीन

छत्तीसगढ़ परिवहन विभाग डहार ले तियार करे गे ए ऐप ल गूगल प्ले स्टोर ले डाउनलोड करे जा सकत हे। ए ऐप के माध्यम ले यात्री मन बर सार्वजनिक परिवहन सुविधाजनक होही। अभी के बेरा म ए ऐप म पांच हजार ले जादा बस ल सामिल करे गेहे, जउन ह अलग-अलग रद्दा म चलत हे। जल्दीच ए ऐप के माध्यम ले अंतर्राज्यीय बस के संचालन के जानकारी घलो मिलही। बस मन म जीपीएस सिस्टम लगाय जावत हे। बस संगवारी ऐप ल जीपीएस के संग एकीकृत करे जावत हे, जेखर ले बस मनके लाइव ट्रैकिंग घलो हो सकही

बइठक म मुख्य सचिव अमिताभ जैन, अपर मुख्य सचिव मनोज कुमार पिंगुआ, पीडब्ल्यूडी सचिव डॉ. कमलप्रीत सिंह, स्कूल शिक्षा सचिव सिद्धार्थ कोमल सिंह परदेशी, मुख्यमंत्री के सचिव पी. दयनंद, बसव राजू एस. अउ राहुल भगत, परिवहन विभाग के सचिव एस. प्रकाश, आबकारी सचिव आर. संगीता, एडीजी यातायात प्रदीप गुप्ता, अपर परिवहन आयुक्त डी. रविशंकर उपस्थित रिहिस। ए बइठका म जम्मों संभाग के आयुक्त अउ पुलिस महानिरीक्षक वर्चुअल माध्यम ले सामिल होईन। बइठक म इंटरडिपार्टमेंटल लीड एजेंसी अउ एआईजी ट्रैफिक के अध्यक्ष संजय शर्मा ह प्रस्तुति दीस

आप मन पढ़तहव छत्तीसगढी न्यूज़ पोर्टल 36गढ़ी.com