छत्तीसगढ़ी राजभाषा दिवस म प्रदेशवासी ल बड़का सौगात
चित्रतपाला फिल्म सिटी ले होही छत्तीसगढ़ी फिलिम, नाटक ले पर्यटन ल बढ़ावा मिलही
पद्मश्री व्यक्तित्व मनके मानदेय पांच हजार रूपिया ले बढ़ाके दस हजार रूपिया हर महीना कर दे गेहे।
चित्रोत्पाला फिल्म सिटी छत्तीसगढ़ म एक सौ सैंतालीस करोड़ रूपिया के लागत ले बनाय जाही। एखर बर भारत सरकार ह एक सौ सैंतालीस करोड़ रूपिया के मंजूरी देहे। ए जानकारी मुख्यमंत्री विष्णुदेव साय ह आज छत्तीसगढ़ी राजभाषा दिवस के मउका म राखे गे कारीकरम के दउरान छत्तीसगढ़ी भासा म अपन संबोधन म दीन। ओमन बतईन कि राज्य सरकार के प्रस्ताव म केन्द्र सरकार ह फिल्म सिटी बनाय के मंजूरी देके रासि ल मंजूरी दे देहे। ओमन कीहिन कि चित्रतपाला फिल्म सिटी बनाय ले न सिरिफ छत्तीसगढ़ी फिलिम अउ छत्तीसगढ़ी नाटक ल प्रोत्साहन मिलही, बल्कि एखर ले पर्यटन ल घलो बढ़ावा मिलही।
कार्यक्रम म मुख्यमंत्री ह पद्मश्री ले सम्मानित मनला दे जाये वाला मानदेय 5 हजार रूपिया ले बढ़ाके 10 हजार रूपिया हर महीना करे के घोसना करिस।
मुख्यमंत्री ह किहीन कि छत्तीसगढ़ी भाखा के विकास बर राज्य सरकार ह सरलग काम करत हे। छत्तीसगढ़ी गुरतुर भाखा हावय, जेन हमन ल हमर दिल ले जोड़त हावय। ओमन कीहिन कि छत्तीसगढ़ी फिलिम बहुत लोकप्रिय हे। छत्तीसगढ़ी भाखा ल बढ़ावा दे म छत्तीसगढ़ी फिलिम के घलो योगदान हे।
मुख्यमंत्री ह छत्तीसगढ़ राजभाषा आयोग के साहित्य परिषद म संविलियन खतम करे के घोसना करत किहीन कि छत्तीसगढ़ राजभाषा आयोग ह राजभाषा छत्तीसगढ़ी ल बढ़ावा दे बर काम करत रइही। उल्लेखनीय हावय के पहिली छत्तीसगढ़ राजभाषा आयोग के साहित्य परिषद म विलय करे गे रिहिस।
कार्यकम म मुख्यमंत्री ह छत्तीसगढ़ी भाखा ल साल-श्रीफल अउ स्मृति चिन्ह ले समृद्ध करइया छै झिन साहित्यकार मन ल सम्मानित करीन। ए मउका म ओमन छत्तीसगढ़ राजभाषा आयोग डहार ले प्रकासित छत्तीसगढ़ी भाखा म लिखे गे बारह ठिन पुस्तक के विमोचन घलो करीन।
कार्यक्रम के अध्यक्षता करत सांसद श्री बृजमोहन अग्रवाल ह किहिन के छत्तीसगढ़ी भाखा ल लोकप्रिय बनाये अउ राजभाषा के सम्मान दे के खातिर जरूरी हावय के हम छत्तीसगढ़ी भाषा म संवाद करें अउ नवा पीढ़ी ल भी छत्तीसगढ़ी भाषा दे जाए।
