पुलिस बर अपराधी के मन म भय अउ आम जनता के मन म सम्मान होना चाहि : गृहमंत्री

रायपुर पुलिस अपराध उपर लगाम अउ अपराधी मन के खिलाफ सरलग कार्रवाई करत हे। ये कार्रवाई अउ अच्छा तरीका ले हो सकय अउ आम जनता के मन म पुलिस के प्रति विस्वास कायम रहय, येकर बर प्रदेस के गृहमंत्री ताम्रध्वज साहू ह पुलिस कंट्रोल रूम म रायपुर के पुलिस के कामकाज के समीक्छा करिन। ये बइठक म गृहमंत्री ह पुलिस अधिकारी मन ले कहिन कि वो साइबर सेल अउ सूचना तंत्र ल जादा मजबुत करव ताकि अपराध ल रोके जा सकय। गृहमंत्री ह सब्बो थाना प्रभारी ल निरदेस दिस कि पीड़ित लोगन के रिपोर्ट थाना म आवस्यक रूप ले दर्ज करव अउ अपराध रोके बर रात म गस्त बढ़ावव।
गृहमंत्री ह कहिन कि रायपुर पुलिस ल नगर निगम के संग मिलके अइसे गैराज संचालक ल निरदेस जारी करना चाहि। जउन सड़क तीर गाड़ी खड़ा कर देथे अउ येकर ले ट्रैफिक के समस्या पइदा होथे। गृहमंत्री ह पुलिस अधिकारी मन ल निर्देसित करिस कि पुलिस डाहर ले जवइया वाहन चेकिंग के दउरान ही वोहा आरटीओ के घलो कैंप लगवाव ताकि बिना लाइसेंस वाला मन ल उहीं जगा लाइसेंस बनाय के प्रक्रिया सुरू करे जा सकय।
गृहमंत्री साहू कहिन है कि वो पुलिस कर्मी के कल्यान बर प्रतिबद्ध हे अउ येकर बर रायपुर म पुलिस पेट्रोल पंपों के संख्या बढ़ाय बर विचार करे जात हे। येकर संग ही गृहमंत्री ले जिला म सीसीटीवी कैमरा के संख्या बढ़ाय के घलो बात कहिन, ताकि अपराध ल रोके जा सकय।

बइठक म गृहमंत्री कहिन कि पुलिस अधिकारी मन स्कुल अउ कालेज म जाके छात्र मन ल कानून अउ यातायात के प्रति जागरूक करना चाहि, ताकि वो दुसर ल घलो जागरूक करय। गृहमंत्री ह पुलिस अधिकारी मन ल निर्देसित करिस कि नवा रायपुर क्षेत्र के पुलिस ल ज्यादा एक्टिव रहे के जरूरत हे अउ इहां चारो मुड़ा पुलिस गस्त ल बढ़ाय के आवस्यकता हे।
गृहमंत्री ह वरिष्ठ पुलिस अधिकारी मन ल निर्देसित करिस कि वोहा महीना म कम से कम एक घंव अपन अधीनस्थ अधिकारी अउ कर्मचारी मन ले मिलय, ओखर ले सीधा बात करय, ताकि कोनो समस्या होहि त वोहा सामने आ जहि अउ ओकर निराकरन हो सकहि।

लाइसेंसी बंदूक धारक के बारे म गृहमंत्री ह पुलिस अधिकारी मन ले कहिन कि एक बार सब्बो के परीक्छन करव अउ आवश्यक महसूस नई होही त येकर निरस्तीकरन के प्रक्रिया सुरू करव। समीक्छा बइठक म गृहमंत्री ताम्रध्वज साहू ह रायपुर पुलिस के कार्यसैली उपर विस्वास जतात हुए कहिन कि पुलिस अइसे काम करत हे, जेकर ले अपराधी के मन म पुलिस के भय रहय अउ आम जनता के मन म पुलिस के प्रति सम्मान अउ बढ़त रहय।
बइठक के दउरान संसदीय सचिव विकास उपाध्याय, रायपुर रेंज के आईजी बद्रीनारायण मीणा, वरिष्ठ पुलिस अधीक्षक प्रशांत अग्रवाल समेत जिला के वरिष्ठ पुलिस अधिकारी अउ थाना प्रभारी उपस्थित रहिन।

Leave a Reply

Your email address will not be published. Required fields are marked *