छत्तीसगढ़ माटी के कृष्ण स्व.दाऊ वासुदेव चन्द्राकर
वासुदेव कृष्ण के दूसर नाम, सही मायने म ये माटी के कृष्ण ये स्व. दाऊ वासुदेव चन्द्राकर: मुख्यमंत्री भूपेश बघेल
-स्व दाऊ वासुदेव चन्द्राकर जी अनुभव के सागर, हमेसा याद रखे जाही उंखर गाथा
मुख्यमंत्री भूपेश बघेल ह स्व. दाऊ वासुदेव चंद्राकर जी के आदमकद प्रतिमा के अनावरण करिन। स्वर्गीय वासुदेव चंद्राकर जी ल छत्तीसगढ़ के राजनीति के आधार स्तंभ माने जाथे, वइसे तो चंद्राकर जी 14 साल के उम्मर ले ही स्वतंत्र भारत के सपना ल पूरा करे बर स्वतंत्रता के पहिहलच कई ठन आंदोलन मन के हिस्सा रहिन अऊ छत्तीसगढ़ के स्थापना म उंखर विशेष योगदान रहिस। उमन हमेशा किसान हितैसी रहिन। किसान मन के हित म कभू समझौता नइ करइया स्वर्गीय चंद्राकर जी खुद खेती किसानी के बहुत बढि़या समझ रखत रहिन। अपन जीवन काल म उमन छत्तीसगढ़ के संस्कृति अऊ सभ्यता म प्राणवायु भरे के काम करिन। छत्तीसगढ़ म ओ मन ल हमेशा किसान अऊ मजदूर मन के संगठन अऊ उत्थान बर काम करे के सेती ऊंखर प्रिय नेता के रूप म सुरता करे जाही।
स्व. दाऊ वासुदेव चंद्राकर जी ल राजनीति के चाणक्य के रूप म जाने जाथे फेर मुख्यमंत्री भूपेश बघेल ह एखर संगें-संग ओ मन ल छत्तीसगढ़ के माटी के कृष्ण कहिन, मुख्यमंत्री जी कहना रहिस कि जब ऊंखर नामे म वासुदेव हे अऊ वासुदेव के दूसर नाम कृष्ण हे त एखर ले सुग्घर उंखर परिचय नइ हो सकय।आज कृषि संस्कृति के महत्ता ल दर्शाने वाला हरेली तिहार म मुख्यमंत्री भूपेश बघेल ह स्व. दाऊ वासुदेव चंद्राकर जी के आदमकद प्रतिमा के अनावरण करिन। इहां उमन अपन राजनीतिक गुरु स्व. दाऊ वासुदेव चंद्राकर जी के आत्म चिंतन करिन अऊ उपस्थित मनखे मन के बीच उंखर अऊ अपन अनुभव साझा करिन। उमन आगू स्वर्गीय वासुदेव चंद्राकर जी के बारे म बतात कहिन कि ऊंखर बिना राजनीति के अध्याय के कल्पना नइ करे जा सकय, जनता के विश्वास ऊंखर बर सर्वोपरि रहिस, उमन नैतिकता ल ताक म रखके कभू कोनो काम नइ करत रहिन, उमन हमेशा अपन कार्यकर्ता, आम जनता, मजदूर अऊ किसान मन के हित म अपन अवाज बुलंद करे हें। उमन स्व. दाऊ वासुदेव चंद्राकर ल ऊंखर जीवन के पथप्रदर्शक घलोक बताइन।
ये बेरा म लक्ष्मण चंद्राकर अऊ प्रतिमा चंद्राकर ह मुख्यमंत्री श्री भूपेश बघेल के आभार व्यक्त करिन। एखर संगे संग कार्यक्रम म स्वर्गीय दाऊ वासुदेव चंद्राकर जी के मुर्ति बनइया मुर्तिकार अऊ आर्किटेक्ट के सम्मान करे गीस। जेमां पद्मश्री नेलसन जी मुर्तिकार, शंभु ताम्रकार आर्किटेक्ट, मोहन बराल आर्किटेक्ट अऊ किशोर शिंदे इंजिनियर संघरे रहिन।
कार्यक्रम म गृह मंत्री ताम्रध्वज साहू, विधायक अरूण वोरा, पूर्व विधायक प्रदीप चौबे, आर.एन. वर्मा, नगर निगम दुर्ग महापौर श्री धीरज बाकलीवाल, सभापति राजेश यादव, अब्दुल गनी, पार्षद श्रीमती बबीता यादव, लक्ष्मण चंद्राकर, संदीप वोरा, देवेश मिश्रा, संजय कोहले, कलेक्टर श्री पुष्पेन्द्र कुमार मीणा, संभागायुक्त महादेव कावरे, आईजी बद्रीनारायण मीणा अऊ एसपी डॉ. अभिषेक पल्लव, नगर निगम आयुक्त प्रकाश सर्वे अऊ आन जनप्रतिनिधि व अधिकारीगण उपस्थित रहिन।
