संसो करके पालन करथे

रचना==संसो करके पालन करथे==

संसो करके पालन करथे
बाबु हमर जिनगानी के।
नेव बनके अधारा रहिथे
जइसे घर के छानी के।।

सदा हथेली छइया रखथे
परोपकारी साया के।
अपन ले जादा जतन करथे
बेटा बेटी काया के।।

अपन हसी खुशी मन ल मार के
संतान ल खुशियां देथे।
बाबु अपन इच्छा तियाग के
खेल बर खिलौना लेथे।।

पढ़ाथे लिखाथे संजोथे
सपना जिम्मेदारी के।
बाबु हमेशा गियान बाटे
जीवन जवाबदारी के।।

बाबु साक्षात् भगवान रूप
धरती जग संसारा में।
मन से पूजय मानव,किसमत
कइसे रहि अंधियारा में।।

पितृ दिवस पर कोटि कोटि बधाई शुभकामनाए ।
दीपक पटेल- महासमुंद