स्वामी आत्मानंद स्कुल ले बाढ़हि छत्तीसगढ़ लइका के आत्मबिस्वास

मुख्यमंत्री भूपेश बघेल ह पाटन बिकासखंड मुख्यालय म स्थित स्वामी आत्मानंद इंग्लिश मीडियम स्कूल म प्री प्राइमरी कक्षा के सुभारंभ करिन। दुर्ग जिला के ये पहिली स्वामी आत्मानंद स्कूल हरय, जिहां प्री प्राइमरी के कक्षा चलहि। केजी-1 अउ केजी-2 बर 20-20 सीट म प्रवेस के प्रक्रिया चलत हे। प्री प्राइमरी कक्षा के सुभारंभ मुख्यमंत्री बघेल करिन अउ स्कूल के लइका मन ले गोठ बात करिन। उहीं पाटन विधानसभा क्षेत्र म संचालित सब्बो 7 स्वामी आत्मानंद इंग्लिश मीडियम स्कूल के प्राचार्य अउ सिक्छक मन ले भेंट-वार्ता घलो करिन।

ये दउरान मुख्यमंत्री ह स्कूल के लइका ल मन लगाके पढ़ई करे बर कहिन। येकर संग ही दुसर गतिविधि म घलो हिस्सा लेय बर प्रोत्साहित करिन। मुख्यमंत्री ह पढ़हइया लइका मन संग फोटो खिंचवाइस। इहां मुख्यमंत्री ह लइका मन ल पुस्तक कॉपी के वितरन घलो करिन। उहीं मुख्यमंत्री ह सिक्छक मन ले स्कूल म अच्छा वातावरन निर्मान उपर जोर देय के बात कहिन। ये दउरान जिला के प्रभारी मंत्री मोहम्मद अकबर घलो मउजूद रहिन।

स्वामी आत्मानंद अंग्रेजी माध्यम स्कूल पाटन पहुंचिन त सबले पहिली क्षेत्रीय जनप्रतिनिधि अउ गणमान्य नागरिक मन पुष्पगुच्छ भेंट करके मुख्यमंत्री बघेल के आत्मीय स्वागत करिन। उहीं प्री प्राइमरी विंग के सुभारंभ करके मुख्यमंत्री लइका मन गोठ बात करे बर कक्छा म पहुंचिन, त उहां मउजुद कक्छा दूसरी के छोटे छात्रा चंद्रकला ह गुलाब के फूल देके मुख्यमंत्री के स्वागत करिन। छात्रा ल देखके मुख्यमंत्री घलो प्यार ले बच्ची के सिर म हाथ रखिन। ये दउरान मुख्यमंत्री बघेल लइका मन संग बात करिन अउ लइका मन के रोचक प्रस्न के जवाब दिन।

कक्षा आठवीं के छात्रा विनाक्षी ह पुछिस कि “स्वामी आत्मानंद इंग्लिश मीडियम स्कूल सुरू करे के पीछे ओखर लक्ष्य का रहिस?” येकर जवाब म मुख्यमंत्री बघेल ह अपन स्कूली जीवन ल याद करत कहिन कि, ओकर समय म हर वर्ग के लइका मन बर अंग्रेजी माध्यम म पढ़ई के सुविधा नई रहत रहिस। सहर म अंग्रेजी माध्यम म पढ़ई होत रहिस अउ सब्बो बिसय के सिक्छक घलो रहत रहिस, फेर ग्रामीन क्षेत्र म ये सुविधा नई रहिस। हमर इहां प्रतिभा के कोनो कमी नई हे फेर इहां के लोगन भासा के सेती पिछड़ जात रहिस। येला देखके ही मोला लगिस कि इहां घलो सहर के संगे संग गांव लइका मन बर अंग्रेजी माध्यम म पढ़ई के वातावरणन देय जाय। जइसे राजीव गांधी ह देसभर म नवोदय विद्यालय खुलवाइस, वोइसने स्वामी आत्मानंद स्कूल के सुरुआत करे गिस।

मुख्यमंत्री ह कहिन कि, जब लइका अच्छा वातावरन म पढ़ई करहि त ओकर आत्मविस्वास बढ़हि, अउ आत्मविस्वास ही मनखे के सबले बड़का पूंजी होथे। आप प्रदेस अउ देस के भविस्य हरय, आप मन के सिक्छा ले ही प्रदेस अउ देस तरक्की करहि।

भेंट मुलाकात म बीतत हे गर्मी के छुट्टी
कक्छा सातवीं के छात्रा श्रुति ठाकुर ह मुख्यमंत्री ले पूछिन कि “सर आप अपन गर्मी के छुट्टी कइसे बितात हंव?” येकर जवाब म मुख्यमंत्री बघेल ह कहिन कि, “जनसेवा म कोनो छुट्टी नई होय। ये घंव एक महीना ले प्रदेसभर म भेंट-मुलाकात अभियान चलात हे। येमा मैं सरगुजा अउ बस्तर के 20 विधानसभा क्षेत्र म जा चुके हंव। उहां आम, बरगद, पीपल, साल जइसे पेड़ के नीचे बइठ के गांव के मनखे मन संग गोठ बात करत हंव। उहां योजना ले संबंधित जानकारी लेवत हंव, कि वोला योजना के लाभ मिलत हे कि नई। अइसने ये गर्मी पेड़ के नीचे प्रदेश के जनता से बात करत बीतत हे।”
जीवन म अनुसासन जरूरी :
मुख्यमंत्री ले कक्छा 9वीं के छात्र शैलेंद्र देवांगन ह पूछिन कि ’जब आप स्टूडेंट रहेव, त आप मन के सिक्छक कैसा ट्रीट करत रहिन?’ येकर जवाब म मुख्यमंत्री ह कहिन कि सिक्छक आपमन ले अनुसासन चाहथे। आप बेरा म स्कुल पहुंचव। सिक्छक के निर्देस के पालन करव। कक्छा म पुरा फोकस पढ़ई म करव। कोर्स ले संबंधित जउन समझ म नई आत हे वोला सिक्छक कना पूछव। अनुसासित रहव, खेल अउ स्कुल के दुसर गतिविधि म हिस्सा लेहा त सिक्छक आप मन ल पसंद करहि। सिक्छक के सामने अपन गलती छुपाय के प्रयास मत करव।
मुख्यमंत्री ह बताइस कि ओखर समय म पर्याप्त सिक्छक नई रहिस। अब स्वामी आत्मानंद स्कुल म सिक्छक के संगे संग दुसर संसाधन घलो हे।
लइका मन ल अइसे महउल दव कि ओखर ले सीखे के ललक होवय
पाटन विधानसभा क्षेत्र म संचालित सब्बो 7 स्वामी आत्मानंद इंग्लिश मीडियम स्कूल के प्राचार्य अउ सिक्छक ले भेंट-वार्ता के दउरान मुख्यमंत्री ल सब्बो स्कुल के अधोसंरचना, स्टाफ अउ स्कुल के उपलब्धि के बारे म बताइस। उहीं सिक्छक मन ल संबोधित करत मुख्यमंत्री कहिन कि पाटन क्षेत्र स्वतंत्रता संग्राम सेनानी के भुइंया हरय। जेन मन देस अउर प्रदेस बर कई बड़का काम करिन। क्षेत्र म पढ़ई ल लेके वातावरन पहिली ले रहिस, फेर स्वामी आत्मानंद स्कूल ले लोगन के उम्मीद अउ बाढ़ गेय हे। आज पुरा प्रदेस म अभिभावक अउ लइका स्वामी आत्मानंद स्कूल ल लेके उत्साहित हे। अइसे म स्कूल के समय के बाद लइका मन के गतिविधि के मॉनिटरिंग करे के आवस्यकता हे।
मुख्यमंत्री ह कहिन कि, आप मन अपन स्कूल के जउन उपलब्धि बताय, वोमा थोड़ा अउ धियान देहु त पढ़ई के गुनवत्ता म इजाफा हो जाहि। पहिला सिक्छक ल पालक मन ले संपर्क करे बर घर तक जाना होत रहिस, आज तकनीक के दउर हे। उहीं मुख्यमंत्री ह पढ़हइया लइका मन के प्रतिस्पर्धा बर तइयार करे बर जोर दिन। संग ही कहिन कि पढ़ई के वातावरन अइसे होवय कि लइका ल पढ़ई बोझिल मत लगय। अनुसासन के संग स्कुल के वातावरन प्रफुल्लित होना चाहि। लइका म सीखे के ललक पइदा होना चाहि। मुख्यमंत्री बघेल ह कहिन कि, लइका त कच्चा मिट्टी के तरह होथे, वोला आपमन जइसे आकार देना चाहु दे सकत हंव, फेर ओकर रुचि के अनुसार वोला ढालहु त वे जीवन म अच्छा प्रदर्सन कर पाहि।
स्वामी आत्मानंद स्कूल पाटन म सुविधा
बिकासखंड मुख्यालय पाटन म संचालित स्वामी आत्मानंद स्कुल के परिसर लमसम 2 एकड़ म फइले हे। इहां लइका मन बर अत्याधुनिक 16 क्लास रूम, बायोलॉजी, केमेस्ट्री अउ फिजिक्स के अलग लैब, 3 स्मार्ट क्लास रूम समेत कई सुविधा उपलब्ध हे। इहां डिपार्टमेंट रूम, 2 स्टाफ रूम, हेड मास्टर रूम, प्रिंसिपल रूम, ऑफिस रूम, एग्जाम हाल, ऑडिटोरियम, किताबों ले समृद्ध लाइब्रेरी, स्पोर्ट्स रूम, कंप्यूटर लैब अउ हरा भरा बड़का मइदान के संग भव्य मंच बनाय गेय हे। इहां अंग्रेजी माध्यम के संगे संग हिंदी माध्यम स्कुल घलो चलत हे। वर्तमान म इहां इंग्लिश मीडियम म कक्छा पहिली ले कक्छा दसवीं तक 494 विद्यार्थी अउ हिंदी माध्यम म कक्था नवमीं ले बारहवीं 349 विद्यार्थी अध्ययनरत हे। अब इहां 2022-23 ले इंग्लिश मीडियम म प्री प्राइमरी के कक्छा घलो सुर करे जात हे।