न्याय सब्बो बर-सब्बो डहर’, छत्तीसगढ़ सरकार के वादा होइस पुरा

देस-दुनिया म छत्तीसगढ़ के पहिचान बीते साढ़े तीन बछर म ग्रामीन अउ किसान के संग न्याय करइया राज्य के रूप म पहिचान बनाय हे। मुख्यमंत्री भूपेश बघेल के नेतृत्व म छत्तीसगढ़ सरकार ह ‘न्याय सब्बो बर-सब्बो डहर’ के ध्येय ल लेके योजना लागू करत हे अउ ओखर क्रियान्वयन घलो तेजी ले होत हे। राज्य के ग्रामीन, किसान, मजदूर, गरीब अउ महिला के हित के रक्छा अउ वोला सीधा लाभ पहुंचाय बर छत्तीसगढ़ सरकार ह फइसला लेय हे। येकर सेती किसान, मजदूर अउ ग्रामीन के जीवन म खुसहाली के नवा दउर सुरू हो गेय हे।
छत्तीसगढ़ सरकार ह बीते साढ़े तीन बछर म अपन नीति ले ग्रामीन अउ किसान ल सम्मान ले जिये के अवसर उपलब्ध कराइस, संग ही ग्रामीन अर्थबेवस्था ल एक नवा गति देवत हे। वास्तव म छत्तीसगढ़ सरकार के इही रणनीति छत्तीसगढ़ के बिकास मॉडल हरय, जेकर आज पुरा देस म चर्चा होवत हे।

बता दन कि कई वर्ग बर ‘न्याय’ के कड़ी म छत्तीसगढ़ राज्य म गरीब ग्रामीन भूमिहीन परिवार मन सीधा आर्थिक मदद पहुंचाय बर भारत रत्न पूर्व प्रधानमंत्री स्वर्गीय राजीव गांधी के नाव ले “राजीव गांधी ग्रामीन कृषि मजदूर न्याय योजना” सुरु करे गेय हे। ये योजना के सुभारंभ 3 फरवरी 2022 के सांसद राहुल गांधी ह करिन। राजधानी रायपुर के साइंस कॉलेज मइदान म योजना के सुभारंभ मउका म आयोजित भव्य समारोह म राज्य सरकार ह योजना के तहत पात्र 3 लाख 55 हजार भूमिहीन कृषक मजदूर मन ल डीबीटी के माध्यम ले सीधा ओखर बैंक खाता म रुपया डालिस।
राज्य सरकार ह हितग्राही परिवार ल हर बछर 6 हजार रुपया आर्थिक सहायता देय के प्रावधान करे रहिस, जेला वित्तीय बछर 2022-23 ले 7 हजार रुपया कर देय गेय हे। हितग्राही मन ल बछर 2022-23 के पहिली किस्त के रूप म 71 करोड़ 8 लाख 4 हजार रुपया के रासि मिलत हे।
ये योजना के जरिये समाज के वो परिवार ल सीधी मदद मिलत हे, जेकर जीवन-यापन खेतिहर मजदूर के आय उपर निर्भर हे। छत्तीसगढ़ म राजीव गांधी ग्रामीन भूमिहीन कृषि मजदूर न्याय योजना के तहत लमसम 3 लाख 55 हजार 402 अइसे परिवार पंजीकृत हे, जेकर पास कृषि भूमि नई हे अउ वोहा मजदूरी करके जीवन-यापन करत हे। ग्रामीन भूमिहीन कृषि मजदूर परिवार के तहत चरवाहा, बढ़ई, लोहार, मोची, नाई, धोबी, मांझी, चालकी, गायता, सिरहा, पुजारी, गुनिया अउ पुरोहित जइसे पौनी-पसारी बेवस्था ले जुड़े परिवार, वनोपज संग्राहक अउ दुसर वर्ग घलो पात्र हे। भूमिहीन परिवार ल लाभान्वित करे बर छत्तीसगढ़ सरकार के ये अभिनव योजना हे। ये तरह के योजना देस के दुसर राज्य म नई हे।