छत्तीसगढ़ म मिलिस ओमिक्रोन मरीज, मचिस हड़कंप

छत्तीसगढ़ म मिलिस ओमिक्रोन मरीज, मचिस हड़कंप

रायपुर। दुनिया म ओमिक्रोन वेरिएंट ले दहशत माचे हे। अब इही वेरिएंट छत्तीसगढ़ म घलो मिलिस हे। प्रदेस म एक मरीज मिले के पुस्टि होय हे। बिलासपुर जिला म कोविड-19  ओमिक्रोन वेरिएंट के एक मरीज मिले हे।

स्वास्थ्य विभाग के अनुसार, संयुक्त अरब अमीरात ले लहुते बिलासपुर जिला के एक 52 साल मनखे ह कोरोना संक्रमित हो गेय। ओकर सेपल जिनोमिक सिक्वेंसिंग जांच (WGS) बर इंस्टीट्यूट ऑफ लाइफ साइंसेज भुवनेश्वर भेजे गेय रहिस।

स्वास्थ्य विभाग ल आज जांच रिपोर्ट मिलिस, जेमा कोविड-19 के ओमिक्रोन (“Omicron” B.1.1529) वेरिएंट के पुस्टि होइस।

छत्तीसगढ़ म कोरोना के तीसरा लहर के आसंका हे। इही बीच स्वास्थ्य मंत्री टी.एस. सिंहदेव ह केंद्रीय स्वास्थ्य मंत्री ल पत्र लिखे हे। येमा वोहा जीनोम सीक्वेंसिंग के सुविधा सुरू करे के मांग करिस हे। अभी सैंपल भुवनेश्वर भेजे जात हे।

उहीं मुख्यमंत्री भूपेश बघेल ह कोविड के तीसरा लहर ले बचे बर भारत सरकार ले प्रोटोकॉल जारी करे के अनुरोध करे हे। मुख्यमंत्री कहिन कि कोरोना प्रोटोकॉल के पालन करके परीक्छा कराय जाहि अउ सेंटर के संख्या बढ़ाय के निरदेस देय जाहि। प्रदेस के आर्थिक गतिविधि म कोनो तरह के कोनो रोक नई हे।