नंदलाल देवांगन बनिस बिरगांव महापौर, भाजपा के दांव होइस फेल

नंदलाल देवांगन बनिस बिरगांव महापौर, भाजपा के दांव होइस फेल

रायपुर। बिरगांव नगर निगम म कांग्रेस के महापौर बनिस। पार्षद मन नंदलाल देवांगन ल महापौर चुनिस। बता दन कि अप्रत्यक्ष चुनाव म नंदलाल देवांगन ल 25 वोट मिलिस। उंही BJP प्रत्यासी पतिराम साहू ह 15 वोट पाइस। सभापति के जिम्मेदारी कृपा ल सौंपे गिस। ये चुनई म जोगी कांग्रेस ह बीजेपी के समर्थन करिस। फेर वोमन बीजेपी ल नई जीता पाइन।

बता दन कि कांग्रेस ल इंहा 40 म 25 पार्सद मन कांग्रेस के पक्छ म वोट डालिस। येमा 6 निर्दलीय पार्सद घलो सामिल हे। उहीं बीजेपी प्रत्यासी ल 15 वोट मिलिस। 3 निर्दलीय पार्सद पहिली ले ही कांग्रेस म सामिल हो गेय रहिस। बाद म तीन अउ निर्दलीय कांग्रेस ल समर्थन दिस।

जानव महापौर नंदलाव देवांगन ल

नंदलाल देवांगन बिरगांव के वार्ड 25 म रहिथे। इंहा ले वोहा तीन घंव चुनई जीते हे। वोला रायपुर ग्रामीन के कांग्रेस विधायक सत्यनारायण शर्मा के करीबी माने जाथे।

बीजेपी प्रत्यासी पतिराम साहू ह वार्ड नंबर 18 ले चुनई जीते हे। कांग्रेस प्रत्यासी सुबोध कुमार वर्मा ल 401 वोट के अंतर ले हराइस।

बिरगांव म पार्सद के संख्या

बिरगांव नगर निगम म कुल 40 वार्ड हे। नगर निगम बने के बाद दुसरा घंव 20 दिसंबर के चुनई होइस, जेमा कांग्रेस ल 19, भाजपा 10 अउ जनता कांग्रेस छत्तीसगढ़ ल 5 सीट म जीत हासिल होइस। उहीं 6 निर्दलीय पार्सद घलो जीत दरज करिन।