राजस्थान के लहसुन ल तमिलनाडु म मिलत हे बढि़या दाम

राजस्थान के बारन क्षेत्र के किसान लहसुन के फसल ल ग्रेडिंग अउ पैंकेजिंग करके तमिलनाडु भेजत हें। किसान मन ह ए ग्रेडिंग अउ पैंकेजिंग के शुरूआत करे हें, एखर ले किसान मन ल अच्छा मुनाफा होवत हे। लहसुन के फसल बर बारिश अऊ मौसम अनुकूल होए ले लहसुन के अच्छा उत्पादन देखे ल मिलत हे। ए पईत के लहसुन के स्वाद अऊ गुणवत्ता घलोक अच्छा हे। पैकिंग, ग्रेडिंग अऊ ट्रांसपोर्ट के खरचा निकाले के बाद किसान मन ल अकतहा लाभ मिलत हे। जिला के मंड़ी मन म लहसुन के औसत भाव करीबन 4 हजार रुपए क्विटंल मिलत हे, जबकि तमिलनाडु के मंड़ी मन म करीबन 6 हजार प्रति क्विंटल मिलत हे।




लहसुन के वैज्ञानिकता-
लहसुन म गंधक सहित यौगिक एलाएल प्रोपाइल डाईसल्फाइड अउ एलिन नामके अमीनो अम्ल पाये जाथे। सामान्य दशा म एलिन रंगहीन, गंधहीन अउ जल म घुलनशील होथे फेर जब लहसुन काटे, छीले अउ कूचे जाथे त ये मां उपस्थित एलीनेज एन्जाइम सक्रिय हो जाथे अउ एलिन ल एलिसिन म बदल देथे। एकरे सेती ये मां ले विशिष्ट, तेज गंध आए लागथे। जीवाणु मन के विरुद्ध सक्रियता घलोक इही एलिसिन नाम के पदार्थ के सेती होथे।



लहसुन के उपयोग पूरा संसार म मसाला या कई ठन दवई के रूप म होथे। ताजा लहसुन म खाद्य पदार्थ जइसे कार्बोहाइड्रेड (62.8%), प्रोटीन(63.3%), लवण (1%), रेशे (0.8%), एखर अकतहा कैल्शियम, फॉस्फोरस, लोहा आदि तत्व पाये जाथे संगे च विटामिन्स ए, बी नियामिन, निकोटिनिक अम्ल घलोक पाये जाथे। लहसुन म कई ठन औषधीय गुण पाए जाथे, जेखर सेती ये अड़बड़ जुन्‍ना बेरा ले बिक्‍कट उपयोगी मसाला के फसल ये। लहसुन के परयोग अचार, चटनी, केचअप आदि संसाधित पदार्थ मन ल बनाए म करे जाथे।

जमीन अउ जलवायु-
लहसुन के खेती कोनो प्रकार के जमीन म करे जा सकत हे फेर एखर बर जीवाश्म सहित उपजाऊ अउ जल निकास सहित बलुई दोमट अऊ दोमट मिट्टी उपयुक्त होथे। भारी, चिकनी मिट्टी म कंद के आकार छोटे होथे अउ एमा खोदाई म कठिनाई होथे। ये पाला अउ लवणीयता ल घलोक कुछ स्तर तक सहि कर सकत हे। लहसुन के बढोतरी के समय ठण्डा अउ नम जलवायु अउ कन्द परिपक्वता के समय शुष्क जलवायु उपयुक्त रहिथे। ठंडा जलवायु के पौधा होए के कारण एखर खेती फलदार बगीचा म घलोक करे जा सकत हे। जादा तापमान अउ नमी म एकर कली मन के सरे के संभावना रहिथे अउ अंकुरण म उलटा प्रभाव परथे। एखर अच्छी उपज बर 130-240 सेन्टीग्रेट तापमान के जरूरत होथे।



Related posts