कलेक्टर-एसपी संग अधिकारी मन लगाइन पौधा

कलेक्टर श्री रजत बंसल अउ एस.पी. श्री बालाजी राव ह आफिसर्स काॅलोनी परिसर म आज बिहिनिया फलदार अउ फूलदार पौधा लगाइन। उन मन काॅलोनी म रहइया अधिकारी मन संग नीम, आंवला, अशोक, आम, जामुन, कटहल के संगे संग कनेर, ट्रिकोमा के 100 ले अधिक पौधा रोपिन। उद्यानिकी विभाग के सहयोग ले लगाए गे पौधा मन ल कलेक्टर ह लगाए के संगे-संग उन्कर बाढ़त ले सुरक्षित अउ संरक्षित रखे बर तको अधिकारी मन ल कहिन। ए बेरा म अतिरिक्त जिला अउ सत्र न्यायाधीश श्री सिराजुद्दीन कुरैशी, जिला पंचायत के सी.ई.ओ. श्री विजय दयाराम के., अपर कलेक्टर श्री दिलीप अग्रवाल अउ अबड़ अकन विभाग के अधिकारी मन घलो काॅलोनी परिसर म पौधा लगाइन। संगे संग ‘धनहा धमतरी‘ नामक एप म पौधरोपण ल अपलोड करिन।

चटकारा
परेटन:- देख भैया मेह कतेक सुग्घर गुलाब के फूल बनाए हौं एकदम डिक्टो दिखत हे न ?
गंगाराम:- तैं काबर फोकट के सियाही अउ कापी भर ल खराब करथस रे, बनाए बर बेसरम अउ बताए बर गुलाब फूल। तोरे असन ल किहिस होही खाए बर भाजी – भात बताए बर बोकरा।
परेटन:- वा तें समझ गेस नहीं, ताहेन भइगे, अउ का।

Related posts