रायपुर : साढ़े तेरह करोड़ के दू ठिन जल परियोजना मन ल मिलिस स्वीकृति

धमेन्‍द्र निर्मल के सार समाचार, राज्य सरकार ह बिलासपुर अउ कांकेर जिला म दू ठिन जलाशय योजना के निर्माण बर 13 करोड़ 75 लाख 53 हजार रूपिया के प्रशासकीय स्वीकृति जारी करे हावय। बिलासपुर जिला के विकासखण्ड बिल्हा के डंगनिया जलाशय योजना के निर्माण बर चार करोड़ 74 लाख 48 हजार रूपिया की स्वीकृति जारी करे गे हावय। योजना के निर्माण ले 120 हेक्टेयर क्षेत्र म सिंचाई सुविधा उपलब्ध हो सकही। कांकेर जिला के विकासखण्ड नरहरपुर स्थित दुधावा जलाशय के स्पील चैनल में 1860 मीटर तक फाल के निर्माण बर नौ करोड़ एक लाख पांच हजार रूपए के स्वीकृति प्रदान करे गे हे।

चटकारा
फिरतू:- कस रे ! मुँदरहा ले रोज के तै कहाँ जाथस ?
पंचू:- बाहिर भाँठा तो गे रहेंव गा।
फिरतू:- घर म शौचालय म काबर नइ जावस त ?
पंचू:-बाहिर म सुध्ध हवा मिल जथे। सुरा मन के भोजन के बेवस्था हो जथे। अउ सबले बड़े बात पानी के बचत हो जथे। घर म बाल्टी भर ले जादा पानी लगथे जबकि बाहिर म एके बोतल म काम निपट जथे।