किसान मन ल लखपति बनावत हे बीही के ये नवा किसम VNR BIHI

आजकल मनखे के मूड़ी जतका बड़का बिही ह बजार म अड़बड़ अंदोहल मचाये हे। एक बीही के वजन डेढ़ किलो तक पहुंचत हे अऊ एखर पैदावार करइया किसान मन के माल मंडी म हाथोंहाथ बेंचा जात हे। ये बड़का बिही न सिरिफ देखे म सुंदर लागथे भलुक एकर सुवाद घलोक बढि़या हे। बिही के ए किसिम के नाम हे VNR BIHI हे जऊन ह कई किसान मन ल मालामाल कर देहे हे। ये ह जउन इलाका मन पैदा होवत हे उहां एखर बड़ मांग हे। एखर कीमत 150 रुपिया ले लेके 370 रुपए किलो तक हे।




प्राइवेट जॉब छोड़के शुरू करिस खेती
नीरज एक सॉफ्टवेयर इंजीनियर रहिस फेर अब वो ह जींद के संगतपुरा गांव म खेतीबाड़ी करथे। वो ह ए बिही के बड़का पैमाना म खेती करथे। वो ह बिही के करीबन 1600 पेड़ लगाए हे अऊ साल म दू पइत फसल लेथे। येकर एक पेड़ पूरा साल म 75 ले 100 किलो बिही देथे। नीरज ह ऑनलाइन तको एकर सप्लाई करथे। वो एक पैकेट 555 रुपिया म देथे जेमां तीन बिही होथे, जेकर कुल वजन 1600 ग्राम ले 1800 ग्राम होथे।




कइसे करे जाथे एखर खेती
एखर खेती करना आसान काम नइ हे। येकर बड़ रखरखाव करना होथे। जब फल आथे तब खासतौर म देखभाल करना होथे। फल मन के बैगिंग करना होथे। एक पेड़ ले दूसर पेड़ के बीच म 12 फुट आघू अऊ आठ फुट के बगल म दूसर पेंड होना चाही। नीरज किसान मन ल ए पौधा ल लगाय अऊ रखरखाव के ट्रेनिंग घलोक देथे। वो एखर बर फीस लेथे। येकर ट्रेनिंग दू दिन के होथे।




कहां ले मिलही ये पौधा
अमरूद के ये प्रजाति वइसे तो थाईलैंड ले आये हे। तभो ले इहां अभी एखर पौध मिलथे। एला आप मन डायरेक्ट VNR के नर्सरी ले बिसा सकत हव। www.vnrnursery.in कंपनी के वेबसाइट म रेट के संग एखर पूरा जानकारी देहे हे। कंपनी के वेबसाइट के मुताबिक, कहूं आप मन 1 ले 10 पौधा लेहू त प्रति पौधा एखर कीमत 330 रुपए हे। पौधा मन के गिनती बाढ़े म रेट कम हो जाथे।



Related posts