आदिवासी बहुल कृषि विज्ञान केन्द्र मन के कार्यशाला के शुभारम्भ

रायपुर, इंदिरा गांधी कृषि विश्वविद्यालय, रायपुर के निदेशालय विस्तार सेवाएं कोति ले कृषि विज्ञान केन्द्र मन के वैज्ञानिक मन के कार्यशाला के उद्घाटन करत मुख्य अतिथि निदेशक डॉ. अनुपम मिश्रा ह कहिन के आदिवासी बाहुल्य जिला मन म कार्यरत कृषि विज्ञान केन्द्र मन के न्यूट्री स्मार्ट गांव मन ल भारत सरकार के नीति आयोग कोति ले सहायता दे जाही, जेखर से चावल, दलहन, तिलहन अउ छोटे धान्य के फसल मन ल बढ़ावा मिलही। आदिवासी बाहुल्य क्षेत्र मन म आवासीय कन्या छात्रावास मन म पोषण ले भरपूर बागवानी फसल लगाये जाही। उमन आगू कहिन के आदिवासी अंचल म कुपोषण के सर्वेक्षण करे जाना चाही, जेकर पूर्ति बायोफोर्टिफाइड अनाज, दलहन, तिलहन, फल अऊ सब्जी वाले फसल मन के खेती ले करे जाही।
कार्यशाला म निदेशक विस्तार सेवाएं डॉ. ए.एल. राठौर ह प्राकृतिक संसाधन मन के दोहन अऊ आमदनी बढ़ाए के संबंध म जानकारी दीन। निदेशक अनुसंधान सेवाएं डॉ. आर.के. बाजपेयी ह विश्वविद्यालय कोति ले विकसित तकनीक ले किसान मन के आमदनी म वृद्धि ल सार्थक बताइन। कार्यशाला म मध्यप्रदेश अऊ छत्तीसगढ़ के कई ठन जिला मन म कार्यरत कृषि विज्ञान केन्द्र मन के वरिष्ठ वैज्ञानिक अउ प्रमुख उपस्थित रहिन। कार्यशाला के आखरी म आभार प्रदर्शन वरिष्ठ वैज्ञानिक डॉ. (श्रीमती) नीता खरे कोति ले करे गीस।

Related posts