अमृता : धरम बदल के अपन ले 12 साल छोटे हीरो संग करे रहिस बिहाव

हिन्‍दी फिलिम के हिरोईन अमृता सिंह अपन समय के बड़का हिरोईन रहिस। अमृता सिंह अभिनेता सैफ-अली खान के पहिली पत्नी ये। अमृता के जनम 9 फ़रवरी 1958 के दिन एक सिख परिवार म होय रहिस। इंकर पिता के नाम सरदार सविंदर सिंह अउ माँ के नाम रुख्शाना सुलतान रहिस। हम आपप ल बता देवन के अमृता सिंह प्रसिद्ध लेखक खुशवंत सिंह के भतीजी ये। अमृता सिंह ह दिल्ली के मॉडर्न स्कूल ले पढ़ाई करे हे। वो ह हिंदी, अंगरेजी अऊ पंजाबी भाखा बने सहिन जानथे।




अमृता सिंह के बिहाव वोकर ले 12 साल छोटे सैफ अली खान ले होए रहिस। इमन बिहाव बर अपन धरम तको बदल ले रहिन, अऊ फिल्मीं दुनिया ले दूरिहा गए रहिन। फेर उंखर ये बिहाव सिरिफ 13 साल तक ही चल सकिस, 2004 म दुनों के तलाक हो गीस। सैफ अली खान ल पटौदी के नवाब के नाम ले घलोक जाने जाथे। इनकर दू लइका हे जकर नाव हे सारा अली खान अउ इब्राहिम अली खान।



अमृता के फिल्मीं करियर के शुरुआत फिल्म बेताब ले 1983 म होइस। ए फिलिम म वो ह सनी देओल के संग नजर आये रहिस। वोकर बाद उमन कई फिलिम मन म काम करिन। जेमा मर्द जइसे फेमस फिलिम तको सामिल हे, ए फिलिम म अमिताभ बच्चन तको काम करे रहिन। अमृता ह सकारत्मक किरदार के संगें-संग फिल्म राजू बन गीस जेंटलमैन, आइना जइसे फिलिम मन म नकारात्‍मक किरदार घलोक निभाये हे। अपन फ़िल्मी करियर म येला फिल्म फेयर के बेस्ट सपोर्टिंग एक्ट्रेस के अवार्ड घलोक मिले रहिस।




अभिनेता सैफ अली खान ले बिहाव होए के बाद अमृता अपन फ़िल्मी करियर ले ब्रेक लेके अपन परिवार संभाले लगे रहिस। अमृता ह साल 2002 म शहीद फिलिम ले वापस फिलमी दुनिया म वापिस लहुटिन। आप मन ल सुरता होही उमन ए फिल्म म भगत सिंह के माँ के किरदार निभाये रहिन। वोकर बाद दस कहानियाँ, शूट आउट ऐट लोखंडवाला जइसे फिल्म म तको नजर आइन। 2014 म वो मन धर्म प्रोडक्शंस के फिल्म 2 स्टेट्स म नजर आइन। ये फिल्म चेतन भगत किनोवेल उपर आधारित रहिस। अमृता ह ए फिल्म म अर्जुन कपूर के पंजाबन माँ के किरदार निभाये रहिन। जेकर दर्शक अऊ आलोचक मन खूब सहरईन।

Related posts